KUCHING: Opis Menteri Dagang Antarabansa, Industri enggau Meranak Puku Sarawak (MINTRED) udah nyendiaka bantu belanja komprehensif ngagai Dagang Mikro, Mit Enggau Jelan Pemesai (MSME) nengah program baka GERAK, USTEV, Go Digital, SKMS enggau SPIKS.
Sapit Menteri ba Opis Menteri nya, Datuk Dr Malcolm Mussen Lamoh madah, program ari taun 2021 ngagai suku ketiga 2025 nya udah meri pemaik ngagai lebih 10,200 MSME enggau bantu belanja ke udah dikemendar sepenyampau RM220.3 juta.
Kelimpah ari nya, ku iya, agensi Perintah Besai enggau Perintah Sarawak baka AIM, Bank Rakyat, MARA, SME Corp. Malaysia, Opis Indu enggau Ruang Bilik Sarawak, Opis Betanam Betupi Sarawak, SEDC enggau TEGAS bela nyendiaka macham bantu belanja ngagai MSME.
"Naka diatu, lebih 358,000 MSME udah dibantu sepenyampau RM2.8 bilion.
Iya madah munyi nya maya nyimpul jaku ari Opis Menteri Dagang Antarabansa, Industri Enggau Meranak Puku ba Aum Ketiga Penggal Keempat Kunsil Nengeri (DUN) Sarawak Ke-19 Hari Satu.
Nambah ke jaku iya, Datuk Dr Malcolm madah, opis menteri iya bela bekerejasama enggau agensi bekaul nyaup ngerijister dagang sida nengah program Jum Regista Bisnes (REGISTA).
Naka tu, ku iya nerang, bisi 5,791 orang dagang udah dibantu nengah program REGISTA ke alai 60 peratus ari penyampau nya ulih nerima macham bantu dagang, bulih kontrak perintah enggau sektor peribit sereta ngerembaika makit sida ngagai luar Sarawak.
Ku iya nerang, inisiatif tu nyungkak pengelantang sosioekonomi orang dagang, lebih agi sida ba kandang menua pesisir. -EDISI UKAS
