PALOH: Rayat pupu bansa di Sarawak dilalau terus ngetan penyerakup enggau pengelantang sereta nyeliah sebarang provokasyen ti ulih ngasuh rayat saru penemu enggau ensiban ati.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pengerami baka Hari Raya Aidilfitri nyadi pelasar pemadu manah ngedut kaul entara pupu bansa enggau lantang sereta bela bebasa ke pangan diri.

Ku iya, enti nadai penyerakup, kerejasama sereta sukung rat ari rayat, inisiatif pemansang enda ulih dipejalai enggau lanchar lalu ngeruga pengelantang komuniti menua.

“Naka diatu, mayuh projek pemansang benung chakah dipejalai nyengkaum Projek Jematan Paloh ti deka nyadi kedap penyambung darat pengudah tembu ila kelebih agi ba Pulau Bruit,” ku iya.

Iya madah munyi nya ba Pengerami Aidilfitri DUN Semop ti diatur di Kampung Sebako enggau Kampung Sedi, ditu tadi.

Kaban Kunsil Nengeri (ADUN) Semop nya mega madah, projek nya disadang meri pemaik besai ngagai abis nadai 13 genturung pendiau nyengkaum siti palan pengentap baru, RGC Semop sereta siti rumah panjai, kelebih agi ari sukut pekara rama enggau ekonomi.

Nambah ke nya, Datuk Abdullah mega madah ke iya agi ingat ke pesan siku ex-tuai genturung pendiau keterubah nyadi pengari rayat ti ngemerat perengkaguna pemun baka bekal ai, jalai enggau telekomunikasyen.

Ku iya, pesan nya nyadi peransang ngagai iya ngambi naka ulih meri servis pemadu manah ngagai rayat ba DUN Semop.

Bela datai, Kaban Parlimen Tanjong Manis Dato Ir Yusuf Abd Wahab.-EDISI UKAS