Ari penyampau nya, sepenyampau RM200,000 diagih nengah Program Transfomasyen Menua Pesisir (RTP) dikena nyeruri infrastruktur enggau fasiliti Gerija ‘GoodNews Fellowship’ Kampung Annah Sadir, lalu manggai RM500,000 da ngaul mayuh projek pemansang infrastruktur ti dikemendar sepanjai taun 2025.
Sapit Menteri Pengangkut Sarawak (Langit enggau Darat) ti mega Kaban Kunsil Nengeri (ADUN) Mambong, Datuk Dr Jerip Susil madah, agih belanja nya mandangka penyiru perintah nentuka pemansang inklusif ti meri pemaik terus ngagai rayat, kelebih agi ba menua pesisir.
Ku iya, pejalai projek nya ukai semina meri empas ngagai Kampung Annah Sadir enggau Annah Rais, tang mega diasai ke genturung pendiau ngelingi nya baka Kampung Simuti, Kampung Sibakar enggau Kampung Sibuang.
Iya madah munyi nya ba Pengawa Sembiang Minggu Paskah enggau Merekat Berau Baru di Gerija ‘GoodNews Fellowship’ Kampung Annah Sadir, ditu kena Hari Minggu.
Ngenang silik, Datuk Dr Jerip mega madah ke projek jalai ari Tepoi ke Sadir beungkus RM250 juta udah dikemendar lalu disadang nyadi penyungkak besai pemansang sosioekonomi sereta nambah rentayan penyambung dia.
Nambah ke nya, iya ngemeratka pemesai reti pengadang, begulai enggau sukung komuniti nyadi pugu nentuka genap inisiatif pemansang ti dilanggur ulih dikemujur.
Sama datai, Pegawai Tadbir Menguasa Pelilih Mit Padawan Julius Scott Sapong. - EDISI UKAS
