RMK-13: RM403.25 Juta Diungkup Dikena Ngaga 15 Palan Industri, 15 Projek Anjung Usahawan
KUCHING: Opis Menteri Dagang Antarabansa, Industri Enggau Meranak Puku Sarawak (MINTRED) udah diungkup RM403.25 juta dikena ngaga 15 palan industri enggau 15 projek Anjung Usahawan nengah Pelin Pemansang Malaysia Lumpar Ke-13 (RMK-13).
Sapit Menteri ba Opis Menteri nya, Datuk Dr Malcolm Mussen Lamoh madah, tuju strategik inisiatif tu dikena ngerembaika infrastruktur dagang enggau kilang ngagai mengeri mit sereta kandang menua pesisir.
"Semua projek besai tu diatu ba macham renggat ngaga nyengkaum proses nentu palan, minta palan endur ngaga, ngempu tanah, langkar sereta nyendia tender,” ku iya nerang.
Iya madah munyi nya maya nyimpul jaku ari Opis Menteri Dagang Antarabansa, Industri Enggau Meranak Puku ba Aum Ketiga Penggal Keempat Kunsil Nengeri (DUN) Sarawak Ke-19, Hari Satu.
Ku iya, RMK-12 bisi enam projek palan industri di Kuching, Sri Aman, Betong, Bintulu enggau Miri mungkur 119 ekar pemesai enggau semua beungkus RM132.1 juta mujur ditembu.
Kelimpah ari nya, dua Anjung Usahawan di Kuching mega digaga enggau ungkus RM19.2 juta.
Nambah ke jaku iya, iya madah, MINTRED mega udah belabuh ba renggat nangkan nya enggau ngaga lima iti agi palan industri ba Kuching, Sibu enggau Bintulu mungkur kandang endur 417 ekar pemesai.
"Lima palan industri baru tu enggau empat projek Anjung Usahawan baru deka digaga nengah belanja ti dikemendar sepenyampau RM139.1 juta," ku iya. -EDISI UKAS
