KUCHING: Sarawak ransing ngadaka orang dagang nembiak nengah program SYStartUP ke diatu majak nempa pemujur ba pemayuh, tikas dagang sereta asil sepemanjai taun tu.

Menteri Raban Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, program pengawa dagang nembiak diatu nyadi malin ketegal pengulih nempa ekosistem ke mungkur latih intensif, sukung, akses dagang sereta ulih matau pengawa.

“SYStartUP Cohort 2 ke diatur di Miri ari 8 nyentuk 15 November nerima 393 peminta alai 150 penyereta pemadu nyulut dipilih.

"Semua penyereta mujur nembu modul intensif, mandangka sida bisi pengerindu lalu sedia deka ngemeran pengawa dagang," ku iya.

Iya bejaku munyi nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19 ditu, Hari Dua.

Iya mega madah, Cohort 1 udah ngayanka pemujur alai 174 iku orang dagang baru enggau asil manggai RM830,753.

“SYStartUP Cohort 1 (2024) mega dipadah pemadu nyulut ti dipadah siti ari pemadu jampat di Malaysia alai 174 iku penyereta udah berengkah ngepunka dagang, 110 ngerejista kompeni, 181 pengawa puang ditempa, 114 outlet baru enggau RM830,753 asil naka suku ketiga taun tu," ku iya madah baru.

Kelimpah ari nya, iya madah, bepun ari pemujur nya, Opis Menteri iya deka nandu Startup Biz Initiatives ngagai lima sitak menua iya nya di Kuching, Sri Aman, Sibu, Bintulu enggau Miri ti meri latih praktikal ngagai lebih 150 alumni.-EDISI UKAS

Pemberita : Maryam Zanariah Ibrahim
Gambar : Jaed Tepus