KUCHING: Pengeransing negap governans, pengelurus enggau pengawa bejalaika servis perintah Sarawak majak nerima perati ba renggat antarabansa lebuh deligit Danish Parliamentary Ombudsman enggau Duta Besai Denmark ke Malaysia, H.E. Kristine Vangkilde Berner ngatur penemuai gawa ngagai Sarawak Informations Systems Sdn. Bhd (SAINS) ditu, Hari Empat.

Direktor Unit Komunikasi Awam Sarawak (UKAS), Awang Putrayusrie Awang Redzuan, ba jaku pengelalu madah, penemuai gawa deligit ti betuai ke Hon. Christian Britten Lundblad nya mandangka pemesai guna bekunsi peneleba entara dua institusyen perintah ba pekara governans, pengelurus sereta bejalaika servis ngagai rayat.

Ku iya, UKAS siti ari agensi komunikasyen perintah megai tanggungpengawa besai ngatur sereta matau sistem TALIKHIDMAT dikena nentuka sada rayat datai ngagai agensi pengatur.

“Nengah TALIKHIDMAT, kitai nentuka tetiap sebana, langgur, tanya tauka terima kasih ari rayat dikenatai sereta diputar enggau efektif.

"UKAS nyeraris kerejasama entara lebih 260 agensi Perintah Nengeri enggau Perintah Besai ngambi lengkas mutar isu rayat,” ku iya nerang.

Ku iya, TALIKHIDMAT diatu nyadi 'one-stop centre' komunikasyen rayat enggau perintah ti nyambung rayat enggau bemacham servis agensi perintah.

Tanggungpengawa sistem tu, ku iya nerang, majak beguna nentuka servis perintah meruan responsif sereta seriris enggau aspirasyen rayat.

Awang Putrayusrie mega meri terima kasih ngagai deligit Denmark ke udah nemuai sereta ngemata operasyen sistem atur timbal tanya rayat Sarawak nya.

“Kami gaga nerima penemuai deligit Ombudsman Denmark enggau opis duta iya. Penemuai tu ngerandang peluang kerejasama besai, lebih agi besilih penemu enggau pengawa pemadu manah ba negap institusyen atur perintah," ku iya baru.

Iya ngarap penemuai nya ukai semina meri penerang silik bekaul chara Sarawak mutar sebana rayat, tang ulih nempa kerejasama entara Sarawak enggau Denmark dudi hari.

Penemuai nya bela digulu bala pegawai kanan ari opis Ombudsman Parlimen Denmark enggau Opis Duta Denmark.—EDISI UKAS

Pemberita: Eisner Nala
Gambar: Ibanez Jeffery