MERADONG: Tanggungpengawa Gerempung Apai Indai enggau Pengajar (PIBG) diatu majak beguna nyadi bakih strategik Sekula Primari (SK) Ulu Binatang ba pemansang pelajar.

Kaban Kunsil Nengeri (ADUN) Meradong Datuk Ding Kuong Hiing madah, pekara tu kelebih agi nengah atur program beripai, bantu belanja, sukung akademik enggau aktiviti ngaul komuniti ti negap pemansang pelajar sekula.

“Kerejasama rat semua raban nentuka SK Ulu Binatang deka terus nyulut ba akademik enggau kokurikulum enggau nempa pemereti nembiak enggau manah ulah sereta nyeliah penemu negatif baka kes beduan,” ku iya.

Iya madah munyi nya ba Pengerami Makai Lemai PIBG SK Ulu Binatang ditu kena Hari Lima.

Datuk Ding mega muji raban pengajar ba SK Ulu Binatang ti nunjukka pengeransing taja gawa ba sekula menua pesisir.

Ku iya, sida mega ngajar, ngembing, nyeridi enggau nempa pemereti ati nembiak seraya ngansing ke awak, pengelelak enggau duit nentuka nembiak bulih penemu ti chukup. - EDISI UKAS