KAPIT: Perintah terus negap pengawa nyaga pengerai mensia mayuh enggau pengelikun komuniti nengah Program Mass Vaksinasyen Anti-Rabies, Mikrochip enggau Meri Lisin Ukui 2025 ba pelaman Opis Kaunsil Pelilih Kapit, Hari Enam tu tadi.
Program diatur Opis Servis Veterinar (DVS) Bagi Menua Kapit nengah kerejasama Kaunsil Pelilih Kapit nya nyeremin komitmen meruan perintah nagang pengerekai rabies lalu meri pengeleda ngagai komuniti bekaul tanggungpengawa nyadi pengempu jelu diinang kelebih agi ukui.
Nengah atur program nya, bisi 20 iku ukui udah nerima anti-rabies, nyengkaum tujuh iku dituchuk dos keterubah enggau 13 iku dituchuk dos pengalak.
Pia mega, 10 iku ukui dilekat mikrochip seraya 13 pengempu ukui bisi datai ngemujur inisiatif nya.
Kelimpah nyendia servis vaksinasyen anti-rabies pechuma, program tu mega ngemerat penemu mensia mayuh nengah servis sanding penemu sereta kimpin narak pengeleda bekaul pemesai guna vaksinasyen, rejister enggau nyaga jelu diinang nya.
Dikena nentuka pemujur program nya, sekeda atur udah ditetap baka jelu diinang nya gerai, beumur abis nadai tiga bulan sereta enda nusu ke anak.
Inisiatif nya bukti pengeran DVS Sarawak begulai enggau raban bekuasa lokal nyamin pengelantang pengerai mensia mayuh enggau nyendia endur ti likun agi kelebih agi ba sitak menua pesisir baka Kapit.
Berebak enggau nya, mensia mayuh diperansang semampai meri sukung enggau kerejasama ba program pengerai veterinar ti diatur belama dikena nyamin komuniti ti gerai enggau nadai rabies. – EDISI UKAS
