Kaban Parlimen Batang Sadong, Rodiyah Sapiee madah, pengawa bejalai bebala mayuh Mantar Krismas nya nyata nunjukka pengerami nya ungkup serap komuniti ngaul nembiak mit, nembiak sekula primari enggau sekondari, raban nembiak, apai indai sereta orang tuai.
“Tu mih bukti pengerami tu amat enggi semua kitai,” ku iya ba pengerami nya, ditu kena Hari Enam.
Rodiyah mega nyemetak madah, pengelain nya ukai semina realiti sosial tang mega pengering ti meseti dijaga enggau dikemegah.
Ku iya, semangat beserakup pupu bansa ba Simunjan semampai dirami begulai nadai ngira jalai pengarap sekali ke Islam tauka Krismas seraris enggau reti pengelantang ti nyadi pugu pengidup rayat Sarawak.
“Nya alai, aku deka pengawa bejalai bebala mayuh Mantar Krismas tu ditampung nyadi program ninting taun enggau dipasuk dalam kalinda rasmi pelilih seraya bisi pengulih matak penatai pengusung luar meda penyelai budaya enggau pupu bansa ba Simunjan,” ku iya nyemetak.
Ba lansa bukai, iya nerang ke pemesai guna Unit Pekara Pengarap Bukai (UNIFOR) nyadi bukti pengeransing Perintah Sarawak nyaga pengelantang semua jalai pengarap.
Ku iya, pengawa numbuh unit khas nya nentuka pengelantang jalai pengarap bukai semampai dijaga nyengkaum nengah pengawa ngagih bantu ngagai gerija, kuil, tepikong sereta atur aktiviti pengarap.
“Tu nunjukka Perintah Sarawak semampai nentuka semua jalai pengarap diberi perati ti sebela nentuka kitai ulih terus idup lantang enggau segulai sejalai,”terang iya.
Berebak enggau nya, Rodiyah ngelalau semua gerija enggau rumah sembiang ba Simunjan ti apin rejister enggau UNIFOR berumban rejister dikena ngemuntang pengawa minta bantu Perintah Sarawak.
