Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penyikap komuniti nerima ubah beguna amat nentuka pemansang ti dipejalai meri empas ngagai peranak lokal.
Ku iya, pejalai projek pemansang strategik baka ngaga Jematan Lingga, Tebing Ai Lingga sereta nyendia perengkaguna bukai nya entara inisiatif Perintah Sarawak meransang ekonomi tumbuh enggau ngubah kualiti idup rayat.
“Pengawa ngangkat Lingga nyadi pelilih menua begunaka komuniti ti sedia neleba runding sedia agi nerima peluang baru ti di ditumbuh asil pemansang tu,” ku iya.
Iya nyebut jaku nya nengah teks jaku ti dibacha Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee, serimbai Pengerami Bejadi Regata Lingga 2025 di Tebing Ai Sungai Lingga, kena Hari Enam.
Ku Datuk Patinggi Abang Zohari, Perintah Sarawak ukai semina meri perati ngagai pemansang infrastruktur fizikal tang mega ngemerat pengawa ngubah runding enggau ulah komuniti ngambi ulih ngena manah peluang ekonomi sereta pengawa meranak puku ti bisi nipak pemansang.
“Projek Jematan Lingga deka ngerapit rentayan penyambung enggau nambah akses ekonomi entara endur ngelingi nya seraya pemansang Tebing Ai Lingga disadang nyadi pematak dagang temuai baru ti ulih nyungkak aktiviti ekonomi sereta nyendia peluang gawa ngagai peranak dia,” ku iya agi.
Nambah ke nya, pengawa ngatur pengerami besai baka Regata Lingga dipeda nyadi pelasar semitan ngemansang pelilih nya ngagai tikas ti tinggi agi seraya nyukung agenda pemansang dagang temuai serrais enggau juluk Sarawak Maju 2030.
Regata Lingga 2025 edisyen ketiga ngemata 41 tim ari selampur Sarawak sereta antarabansa iya nya ari Brunei Darussalam.
Bisi 29 tim bepadan ba kategori Raja Sungai seraya 12 tim bepadan ba kategori Battle of Titans.
Nangkan nya, Kaban Kunsil Nengeri (ADUN) Lingga, Dayang Noorazah Awang Sohor madah, champion kategori Raja Sungai deka mai pulai perais mata duit RM15,000 sertea trofi seraya champion kategori Battle of Titans deka nerima perais mata duit RM30,000
“Ngarap pengerami taun tu meri empas besai agi ngagai pemansang ekonomi lokal, ngeranchak dagang temuai sereta ngangkat Lingga nyadi palan besai ba kalinda pengerami Sarawak,” ku iya.
Sama datai, Kaban Parlimen Batang Lupar Shafizan Kepli, Kaban Kunsil Nengeri (ADUN) Simunjan Awla Dris sereta Residen Bagi Menua Sri Aman Mahra Salleh. - EDISI UKAS
