SERIAN: Unit Pekara Pengarap Bukai (UNIFOR) keran nyaup pemansang gerija enggau rumah sembiang bukai ba menua pesisir Sarawak.
Kaban Kunsil Nengeri (ADUN) Tebedu, Dr Simon Sinang Bada madah, UNIFOR semampai betati ke peminta gerija enggau rumah sembiang bukai ba pengeran nyendia palan sembiang ti lantang agi.
“Pekara tu nyata dipeda lebuh sehari tu bisi tujuh Tuai Genturung Pendiau, chairman gerija enggau kapitan udah nerima chek sepenyampau RM1.45 juta,” ku iya ba Pengerami Tuai Ngaul Rayat ba Kampung Lanchang Sabai, ditu kena Hari Enam.
Ku iya, pengawa nyua chek nya dikena nyaup raban gerija ngepun pengawa nyeruri gerija sida.
Ba lansa sama, Dr Simon mega nerang ke Perintah Sarawak udah ngagih belanja sepenyampau RM150 juta ngagai tetiap pengari rayat ba sitak Bidayuh nengah Agensi Penyeraris Pemansang Greater Kuching (GKCDA).
“Tu dikena ngerumban pejalai projek pemansang infrastruktur ba menua pesisir Sarawak sebedau taun 2030,” terang iya.
Berindik ari nya, iya ngarap semua agih belanja enggau bantu ti diterima mensia mayuh ulih dikena manah ke pengelantang enggau pemaik begulai.
Sama datai, pengari Residen Bagi Menua Kennie Dias Karit, pengari Pegawai Pelilih Serian Stella Eve Blitten sereta bala Tuai Raban Bansa enggau Tuai Komuniti (KMKK). - EDISI UKAS
