LAWAS: Raban ti ransing nambah penemu enggau pengelandik nya tulang belajar ngagai pemansang sosioekonomi lokal enggau ngesan tanggungpengawa nyungkak pemansang komuniti.

Sapit Premier Sarawak, Datuk Amar Awang Tengah Ali Hasan madah, tetiap aktiviti ekonomi taja mit tetap meri penguntung nyata ngagai pemansang ekonomi.

“Kitai nyual kemiding, manuk, serati, kambin enggau bemacham produk pemakai.

“Anang kita berunding kitai enda nyungkak pemansang ekonomi tang kebendar semua kitai bela nyungkak pemansang,” ku iya lebuh bejadi Program Bakul Kasih enggau Roadshow Indu Zon Merapok di Service Centre Ulu Merapok kena Hari Enam.

Ku iya, penatai bemacham perengkaguna ngagai palan betanam betupi nyengkaum pejalai projek pemansang besai deka meri empas nyata ngagai pemansang sosioekonomi enggau pengelantang sosial komuniti lokal.

“Nitih ke penerang raban JBALB, sida ba sitak Ulu Merapok tu udah sedia nerima peminta nyambung bekal ai.

“Aku ngarap Mini Service Center ditu ulih disambung enggau bekal ai nya.

“Pia mega, kitai deka terus nambah bungkur kuasa karan enggau sistem telekomunikasyen,” ku iya.

Nya alai, iya ngarap perengkaguna tu deka ngemuntang penyambung enggau pejalai seraya nyadi penyungkak pengawa ngelaku produk lokal, pemansang tanah sereta kerejasama ba dagang.

Ba pengawa nya, Bakul Kasih Pemedulian disua khas ungkup raban pesakit ba sitak Merapok ti lenyau pun penatai pemisi.

Program tu nyadi lambang penyiru sosial sereta nyamin pengelantang sosial ba renggat baruh.

Bisi mega diatur pengawa nyua chek penyampau RM40,000 ngagai tiga genturung pendiau ti ngambi bagi ba Program Meli Bungai iya nya Kampung Tanah Sibagol, Kampung Bukit Puan enggau Kampung Sasa.

Program tu dipejalai dikena negap ekonomi rayat menua pesisir enggau meransang komuniti ngambi bagi ba pemansang pelilih.

Kerejasama rat entara peranak enggau raban bekaul meseti ditan nentuka Lawas terus mansang nyadi pelilih ti mansang, lantang enggau besemekih. - EDISI UKAS