PANTU: Perintah betati ke nasip rayat di Pelilih Pantu nengah agih belanja sepenyampau RM600,000 dikena mantu orang tasah bah ba pelilih nya.
Pegawai Pelilih Pantu, Raca Mulong, madah ke tuju agih belanja nya dikena ngelempung tating belanja peranak menua ketegal penusah bah, lebih agi ngaul komuniti rumah panjai.
Berebak enggau nya, ku iya, bantu belanja sepenyampau RM1,000 sepintu ba rumah panjai ke tasah ketegal bah ngelui timpuh 48 jam, nitih ke proses peminta udah ditetap.
Iya madah munyi nya maya bejaku serimbai Pengerami Gempuru Mantar Krismas diatur Opis Pelilih Pantu, empai lama.
Ku iya nerang, agih belanja nya nentuka pengawa ngintu pengelantang rayat seruran diperati, kelebih agi maya napi penusah ngenyit ti ngeruga pengidup besehari-sehari peranak.
Ngenang bekaul pengerami nya, iya madah ke pengerami nya ukai semina ngerichah hari besai aja, tang nyadi pelasar ba negap pengelantang enggau penyerakup rayat menua enda ngira asal penatai. -EDISI UKAS
