Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kandang dua taun sebedau 2028, deka nyadi renggat ke mar nentuka pejalai projek nya ulih tembu nitih langgur ditetap.

Berebak enggau nya, iya madah ke pengawa nembu Stesyen ART Hikmah Exchange nyadi hab pengangkut besai, besai reti laban penuduk strategik ba tengah mengeri dikena nyambung mayuh palan ti ditapat ngelingi Kuching.

“Stesyen tu deka bisi akses ngagai semua palan strategik ba tetengah mengeri Kuching nyengkaum ngagai Market Street lalu ari akses Padang Merdeka, jalai ART deka nuju ngagai Jalai Carpenter lalu udah nya terus ke Padungan.

“Nengah rentayan tu, sistem ART bela ulih disambung ngagai Petra Jaya nengah Jalai Gadung, ti nyambung palan opis perintah ba Petra Jaya sebedau disambung ngagai Damai lalu palan stesyen tu mega disambung ngagai Simpang Tiga ke alai opis perintah besai.

“Stesyen tu strategik amat lalu deka nyadi hab besai ART, ti nyambung mensia mayuh ngagai macham endur ba selampur Mengeri Kuching,” ku iya.

Iya madah munyi nya ba aum media sepengudah ngatur pejalai gawa ke Stesen ART Hikmah Exchange, ditu, Hari Lima.

Dipadah, Stesyen ART Hikmah Exchange disadang tembu menyana 2028.

Ngenang pekara bukai, iya madah, siti da fasiliti besai ART iya nya Stesyen Rembus, endur stesyen hidrogen, diatu udah digaga nitih ke langgur ditetap.

Ke penemu mayuh, Datuk Patinggi Abang Zohari madah dua unit 'gerabak' ART keterubah disadang datai di Kuching ba suku keterubah taun dudi, iyanya abis laun April 2026.

Sama nyempulang iya ba pejalai gawa nya, Sapit Menteri Pengangkut Sarawak (Langit enggau Jalai), Datuk Dr Jerip Susil, Chairman Kaunsil Pemansang Ekonomi Sarawak (SEDC), Tan Sri Datuk Amar (Dr) Abdul Aziz Dato Husain, Tuai Pegawai Eksekutif Sarawak Metro, Ts Mazli Mustaffa sereta temuai dipebasa bukai.-EDISI UKAS

Pemberita: Jonnie Kiew

Gambar: Jaed Tepus