Sarawak Negap Idar Kuasa Gadung, Nagang Pengawa Ngelepas Bekau Karbon
KUCHING: Sarawak terus negapka pengeran ngagai agenda ekonomi gadung nengah pengawa nyerungkai enggau pemansang industri ulih dikena baru nyadi inisiatif strategik ngurangka pengawa bepanggai ngagai kuasa fosil sereta nagang pengawa ngelepas bekau karbon.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya seraris enggau kuing tuju pemansang meruan nengeri ti ngemerat ngagai idar kuasa beresi, pengelikun kuasa timpuh panjai sereta pemeruan rampa menua.
Ku iya, dikena ngemujur juluk nya, Institusyen Injiniring Malaysia (IEM) Sarawak ngesan pangku pengawa besai nyadi penyungkak inovasyen enggau penau injiniring kelebih agi merambu sereta ngemansang infrastruktur tan ti nyukung agenda idar kuasa baruh karbon.
Iya madah munyi nya ba Pengerami Makai Lemai Ninting Taun Institusyen Injiniring Malaysia (IEM) Sarawak ditu kena malam Hari Lima.
Premier Sarawak mega madah, inisiatif begulai entara perintah nengeri, institusyen profesional enggau raban industri tu ditaga ngentapka penuduk Sarawak nyadi entara pengemudi pemansang ekonomi gadung ba rantau tu seraris enggau juluk nengeri nuju pemansang baruh karbon enggau besemekih.
Ku iya, pengawa bejalaika Skim Pelajar Tinggi Pechuma Sarawak (FTES) disadang nempa mayuh agi injinir nyadi penyungkak pemansang sereta transfomasyen sektor injiniring ba nengeri tu.
Ba pengerami sama, iya mega ngemata pengawa besilih Tikat Surat Peminta (LOI) ti bebida entara IEM Sarawak enggau Advanced Semiconductor Academy of Malaysia (ASEM), SOLARVEST enggau Saint-Gobain Malaysia kelimpah besilih Sempekat Pemereti Ati (MoU) entara IEM Sarawak enggau Kaunsil Pemansang Industri Berumah Malaysia (CIDB).
Sama datai, Sapit Premier Sarawak, Datuk Amar Profesor Dr Sim Kui Hian, Menteri Kereja Raya, Dato Sri Alexander Nanta Linggi, Sapit Menteri Pemansang Infrastruktur Sarawak, Datuk Ir Aidel Lariwoo, Sapit Menteri Kuasa enggau Pemeruan Rampa Menua Sarawak, Datuk Dr. Hazland Abang Hipni, Presiden IEM, Ir. Prof. Dr. Jeffrey Chiang Choong Luin enggau Chairperson IEM Sarawak, Ir Dr. Angelia Liew San Chuin.
