KUCHING: Sarawak deka ngena chara baru ngaga jalai ba tanah lemi nengah ngaga jalai beringkat dikena nyeliah degradasyen tanah sereta nambah kredit karbon.

Premier Sarawak Datuk Patinggi Tan Sri Dr Abang Abdul Rahman Zohari Tun Datuk Abang Openg madah, pengawa ngaga jalai ba tanah lemi baka di Samarahan suah napi penanggul taja ngena geotekstil, ngujungka jalai mudah jai pengudah lima nyentuk enam taun.

Berebak enggau nya, iya madah, perintah nengeri diatu berundingka chara ngaga jalai beringkat dikena nyeliah penanggul struktur tanah.

“Nengah pengawa ngaga jalai beringkat, kitai enda ngenyai tanah. Tang, tanah nya ulih dikena nyimpan karbon seraya nentuka kitai nambah kredit karbon,” ku iya.

Iya madah munyi nya ba Pengerami Makai Lemai Ninting Taun Pampang Institut Injinir Malaysia (IEM) Sarawak ditu kena Hari Lima.

Ku Datuk Patinggi Abang Zohari, Sarawak keran bejalaika pemansang infrastruktur chara meruan seraris enggau agenda ekonomi gadung nengeri nyengkaum ngena teknologi enggau inisiatif injiniring baru.

Ku iya, chara nya ukai semina ulih ngurangka empas rampa menua tang mega meri nilai tambah ekonomi ngagai nengeri nengah mekanisme kredit karbon.

Ku iya, Sarawak mega bisi pengelebih ari sukut pemansut kuasa ulih dikena baru enggau urung 70 peratus kuasa dipansut nengah hidro enggau ke bukai ari pemansut baruh karbon.

Sama datai, Sapit Premier Sarawak, Datuk Amar Prof Dr Sim Kui Hian, Menteri Kereja Raya, Dato’ Sri Alexander Nanta Linggi, Presiden Institut Injinir Malaysia (IEM), Ir. Professor Dr. Jeffrey Chiang Choong Luin enggau Chairperson IEM Pampang Sarawak, Ir Dr Angelia Liew San Chuin.-EDISI UKAS

Kredit Gambar: Pejabat Premier Sarawak