DARO: Pangku pengawa Tuai Raban Bansa enggau Tuai Raban Bansa (KMKK) sereta Komiti Pemansang enggau Pengelikun Genturung Pendiau (JKKK) beguna amat nyadi jematan entara perintah enggau komuniti lokal kelebih agi ngenataika penerang, nyeraris pemansang komuniti sereta mutar isu pengelantang rayat ba renggat genturung pendiau enggau rumah panjai.

Kaban Kunsil Nengeri (ADUN) Daro Dr Safiee Ahmad madah, pangku pengawa ti beguna nya meseti ditegap nengah pengawa nguasa penemu teknologi enggau pengelandik digital seraris enggau pemansang kemaya hari.

Ku iya, pemintar ngena teknologi beguna amat kelebih agi nyendia ripot, ngatur data sereta ngenatai penerang ngagai raban bekaul sikar enggau berurun agi.

“Pengawa nguasa teknologi ukai semina nambah pemanah atur tang mega nentuka atur dokumentasyen enggau ripot dipejalai berurun, lurus enggau ngasi ba renggat baruh,” ku iya.

Iya madah munyi nya lebuh bejadi Pengawa Nangguh Woksyop Negap KMKK sereta Sekretari JKKK Pelilih Daro enggau Matu Taun 2025 di Balai Komuniti Daro kena Hari Lima.

Dr Safiee mega madah, tuai komuniti meseti seruran nambah penemu enggau pengelandik nyengkaum ngembing enggau ngadu pengawa nentuka semua pengawa bekaul komuniti ulih diadu manah.

Nambah ke nya, iya madah ke program ninting taun nya dikena negap tuai ba renggat baruh ngambi sikar agi ngereja pengawa enggau ulih ngenatai servis ngagai rayat nipak juluk pemansang Perintah Sarawak ti ngemerat atur pengawa manah enggau inklusif.

Ku iya, woksyop baka nya patut ditampung laban nya ukai semina meri penerang ari sukut nyadi tuai enggau atur pengawa tang mega negap KMKK enggau JKKK ngambi mereti ke polisi sereta kuing tuju perintah nengeri.

Iya mega madah, program sebaka udah diatur sebedau tu ba sitak DUN Daro ngaul Pelilih Sibu enggau Pelilih Meradong seraya pengaw ti diatur ba Pelilih Daro enggau Matu ngemujurka agi inisiatif negap tuai komuniti ba semua sitak DUN nya.

Ba pengawa nya, iya mega nyuaka bantu penyampau RM20,000 ngagai Komiti Pengerami Pelilih Daro dikena nyukung mayuh aktiviti komuniti enggau main asal ba pelilih nya.

Sama datai, Pegawai Pelilih Daro Zul Usup sereta pengari Residen Bagi Menua Mukah Siti Hazerah Bolhi.-EDISI UKAS