BALEH: Isu bah ti suah nyadi ba Sekula Primari (SK) Lepong Gaat meseti diberi perati lengkas nentuka pengelantang nembiak belajar kelebih agi nembiak prasekula ti napi penanggul maya musin ujan.

Kaban Kunsil Nengeri (ADUN) Baleh Nicholas Kudi Jantai madah, raban sekula nengah kepala pengajar enggau pengajar udah minta nentuka isu bah ba kandang sekula nya diberi perati raban bekaul ngambi ngiga chara mutar ti meruan.

Ku iya, kepala pengajar sekula nya mega minta ngaga Rumah Arau tauka langkau endur apai indai nembiak prasekula diau bemalam berindik ari nembiak prasekula enda dikemendar diau bemalam ba buding.

“Penatai nembiak prasekula dipeda enda ngemantup ati kelebih agi maya musin pengujan.

“Aku minta Opis Pelajar Pelilih (PPD) ngatur randau dikena ngiga chara mutar isu bah nya,” ku iya.

Iya madah munyi nya ba Pengerami Apresiasyen Nembiak Nyulut Sesyen Akademik 2025/2026 Sekula Primari (SK) Lepong Baleh kena Hari Empat.

Tuju pengerami nya dikena nyua enggau ngaku penyulut nembiak SK Lepong ungkup sesyen 2025/2026 seraya ngerapit kaul entara apai indai enggau raban sekula.

Ba pengerami nya, Nicholas udah ngagihka belanja RM5,000 ngagai Gerempung Apai Indai enggau Pengajar (PIBG) SK Lepong Gaat, taja penyampau nembiak sekula nya semina 29 iku kelai sukung. - EDISI UKAS