SIBU: Majlis Perbandaran Sibu (MPS) ba pelasar ti nemban ngemujur visyen ‘Nuju Mengeri Ulih Endur Diau enggau Meruan Manggai 2031’ nengah mayuh pemujur sereta inisiatif mengeri pintar ti meri pemaik terus ngagai peranak menua.
Sapit Premier Sarawak Datuk Amar Profesor Dr. Sim Kui Hian madah, MPS udah nunjukka penau nyadi siti raban bekuasa lokal ti progresif, inovatif enggau besemekih nipak juluk pemansang mengeri moden enggau meruan.
“Nengah komitmen ti dibantai bala tuai, atur pengawa enggau semua staf MPS sereta sukung bakih strategik, Sibu ba pelasar ti betul ngambi nyadi siti mengeri moden, meruan enggau maju,” ku iya.
Iya madah munyi nya ba teks jaku ti dibacha Kaban Kunsil Nengeri (ADUN) Bukit Assek Joseph Chieng Jin Ek lebuh Pengerami Makai Lemai Ngenang Jasa Raban MPS 2025 ba Hotel Kingwood Hotel ditu kena Hari Lima.
Ku Menteri Pengerai Mensia Mayuh, Pengawa Berumah enggau Perintah Lokal Sarawak nya, entara perati besai MPS nyapai visyen iya nya negap sukut pengerai mensia mayuh, pemeruan rampa menua sereta pemansang komuniti ti bepelasarka peminta rayat.
Ku iya, tu nyengkaum ngemanah servis mengeri sereta bejalaika transfomasyen digital enggau inisiatif mengeri pintar.
“Sibu nya siti mengeri ti diuan pupu bansa enggau idup lantang. Pengelebih enggau pengering nya bepanggai ba penyerakup, budaya enggau rayat.
“Lebih kitai bekerejasama ba semua renggat, kitai nempa Sibu ti beresi, likun, gadung enggau dinamik agi,” terang iya.
Nangkan nya, iya nyemetak madah, pangku pengawa perintah lokal suah napi mayuh pemar, mayuh leman enggau begunaka pengeransing.
Ku iya, MPS bejalaika pangku pengawa besai ninting hari nentuka mengeri tu lanchar nyerangkung sukut pengerai mensia mayuh enggau pemeresi, program komuniti, servis infrastruktur, inisiatif mengeri pintar sereta nerit atur.
“Sekeda inisiatif tu dipejalai betampung enggau suah enda ditemu. Nya kebuah, pengerami malam tu diatur dikena ngenang pengeransing, profesional enggau servis staf MPS ngagai rayat Sibu,” ku iya. - EDISI UKAS
