MUKAH: Pengawa ngatur Mukah Raft Safari ulih diangkat nyadi produk dagang temuai baru dikena matak mayuh agi temuai ari luar Mukah.

Kaban Kunsil Nengeri (ADUN) Tellian Royston Valentine madah, program baka reti nya meri peluang pemadu manah alai ngelakuka Mukah enggau chara ti komprehensif ngagai rayat menua luar.

Nitih ku iya, penyelai ti dikembuan Mukah patut diguna nengah ngatur aktiviti ti ngempung elemen lumba ai enggau pesaka menua.

"Tu nyengkaum budaya, pemakai asal sereta penyelai aktiviti ai ti udah nya ulih diangkat nyadi produk dagang temuai baru.

"Aku andal program tu dipeda nyadi inisiatif tumu ti positif negap identiti Mukah nyadi palan ditapat dagang temuai bepelasarka komuniti enggau budaya menua,” ku iya maya bejaku ba program nyua perais Mukah Raft Safari 2025 ditu, Hari Enam tu tadi.

Nerang silik, Royston madah, pengawa ngatur nya ukai semina nyadi pelasar ngagai peranak menua, tang mega matak penyereta ari menua bukai ngambi bagi ba aktiviti nya.

Ku iya, penatai temuai enggau penyereta luar mantu nyungkak aktiviti ekonomi menua ba kandang ngelingi Mukah.

"Aku ngarap pengawa ngatur program tu ulih ditandu ninting taun.”

"Lalu nya patut bejalai seriris enggau pengawa ngatur program besai bukai ke endang bisi diatur ba Mukah baka Kaul Mukah, Regata Mukah enggau Pengerami Pemakai Mukah," ku iya baru.

Sama datai, Menijar Grit Event Management Awang Salehuddin enggau Kepala Polis Pelilih Mukah DSP Muhamad Rizal Alias.-EDISI UKAS