LUNDU: Bisi 143 penerima ari Kampung Sileng Melayu nerima pemeri Krismas enggau bantu 'Back To School' ke disua Kaban Kunsil Nengeri (ADUN) Tanjong Datu, Azizul Annuar Adenan ba siti pengerami ba Balai Mayuh Guna Mahligai Gading, Hari Minggu tu tadi.

Ari penyampau nya, bisi 23 raban orang seranta enggau 20 nembiak mit nerima pemeri dikena ngintu Krismas, lalu 100 da nerima bantu kantung sekula nengah inisiatif 'Back To School' dikena besikap buka sekula ke deka datai.

Maya bejaku, iya meri terima kasih ngagai Perintah Sarawak laban udah meri macham bantu pelajar ngagai nembiak, bepun ari renggat sekula primari nyentuk palan pelajar tinggi (IPT).

"Bantu nyengkaum uniform sekula, kereban belajar sereta bantu bukai deka ngelempung tating belanja apai indai enggau penyaga,” ku iya.

Iya madah, nembiak ti patut nerima bantu diperansang nganjung peminta bantu pelajar nengah portal Yayasan Sarawak dikena ngulihka penerang silik, nyengkaum bantu ‘laptop’.

Nya alai, ku iya, Opis Palan Servis ADUN N3 Tanjong Datu seruran sedia mantu peminta enti sema kurang tauka saru penemu ba proses peminta.

Berebak enggau nya, iya minta raban pengatur rumah sembiang ngambi nentuka ripot dianjung ngagai Unit Pekara Pengarap Bukai (UNIFOR) tiap kali geran diterima.

Ku iya, ripot nya beguna endar dikena ngemujur proses peminta nangkan nya, seriris enggau atur udah ditetap. -EDISI UKAS