BALINGIAN: Program Bejual Agro Sarawakku Sayang (JASS), inisiatif Opis Menteri Industri Pemakai, Komoditi enggau Pemansang Kandang Menua Sarawak (MFICORD), majak meri penguntung ngagai rayat lebuh nyual bekal pemakai ba rega ke murah agi enti dibanding ba makit.
Kaban Kunsil Nengeri (ADUN) Balingian Abdul Yakub Arbi madah, JASS siti program ti setipak enggau Polisi Jamin Bekal Pemakai Menua sereta Polisi Betanam Betupi Menua 2.0.
“Program tu udah dilanchar kena 30 Ogos 2025 ti dipenyadi Menteri MFICORD Dato Sri Dr. Stephen Rundi Utom ke meri pemaik ti mantu ngelempungka tating belanja idup rayat,” ku iya maya bejadika program nya ba Anjung Selera Balingian, Hari Satu.
Program JASS ti diatur The Federal Agricultural Marketing Authority (FAMA) enggau kerejasama mayuh opis enggau agensi bekaul nyual komoditi nyengkaum sayur, buah, manuk, telu, ikan enggau dagin.
Rega pemakai dijual ba program tu dipelaba manggai RM25,000 lalu meri pemaik ngagai urung 5,000 ruang bilik.
Tuju program tu ngelaku produk ari asil betanam betupi Sarawak, kelimpah nyadi siti ari program ‘Quick Win’ bepelasarka ungkus mit tang mai penguntung ba mantu ngurangka tating belanja idup rayat.
Kelimpah ari nya, JASS mega nambah aksesibiliti enggau pemisi bekal pemakai baru ngagai penguna ba rega ti patut, sereta ngerandang peluang makit bukai ngagai penyereta Program Ladang Kontrak enggau orang dagang menua ngena konsep bejual terus ngagai penguna.
Sama datai, Sapit Direktor (Makit Industri Pemakai) FAMA Nengeri Sarawak Adeyong Tomick.-EDISI UKAS
