KUCHING: Kaunsil Mengeri Kuching Selatan (MBKS) madah pemeri bangku berubat enggau bangku nganti ngagai Unit Imejensi Hospital Besai Sarawak (HUS) ungkup nambah pengelantang pesakit enggau sida sebilik ti nganti diperubat.
Datuk Bandar MBKS, Dato Wee Hong Seng madah, pemeri nengah inisiatif tanggungpengawa rama korporat (CSR) MBKS nya ngaul tujuh unit bangku berubat enggau 10 unit bangku nganti berega RM12,000.
Nitih ku iya, pemeri datai ari penyiru rayat sereta timbal jampat ari raban ke meri pengudah iya nerima peminta ari sida hospital bekaul perengka guna nya.
“Pemeri tu semina ulih diberi ari sukung raban pemeri.
"Pekara dipeda mit baka bangku, tang kebendar besai reti,” ku iya pengudah nyua pemeri nya ba hospital nya, Hari Satu.
Dato Wee mega madah, nya pemeri Hari Krismas, kelimpah madah, agi tubah pekara ba hospital perintah ti patut diseleti, ukai semina perengka guna ungkup orang sakit, tang ungkup lutur, indu misi sereta kaban belayan pesakit ke ngibun.
Entara kompeni ti besaup iya nya Katimas Sdn Bhd, Acute Project Sdn Bhd, Sharing Planet Sdn Bhd, Megastanda Sdn Bhd, Ori Pasti Ori (Kuching) Sdn Bhd, Alfresco (Kuching) Sdn Bhd, HS Credit Corporation Sdn Bhd sereta Wan Li Wan Welding Works.
Kelimpah ari nya, Direktor Hospital Besai Sarawak, Dr. Ngian Hie Ung meri terima kasih ngagai MBKS enggau raban pemeri bantu nya.
Iya madah, HUS sebuah hospital ungkup semua lalu agi begunaka sukung ari macham raban dikena nambah manah alai berubat sereta perengka guna teknologi.
“Taja bisi agih belanja ninting taun ari Perintah Besai, guna ke bendar hospital agi mayuh.
"Pemeri mit ari rayat ulih meri pemaik ngagai pengelantang orang sakit,” ku iya.-EDISI UKAS
Pemberita: Nur Nabilla
Gambar: Mohd Naseem & Nur Nabilla
