BALINGIAN: Empat Projek Rayat ba sitak Balingian udah dipenyadi Kaban Kunsil Nengeri (ADUN) Balingian, Abdul Yakub Arbi kelai perintah ransing ngadu pemansang infrastruktur ungkup pengelantang rayat menua, Hari Satu.
Semua projek nya dipejalai ari baruh atur Kaunsil Pelilih Dalat enggau Mukah (MDDM) ngena agih belanja manggai bejuta ringgit, nyerangkung perengka guna dagang, perengka guna mensia mayuh sereta pengawa ngemanah servis komuniti di sitak Balingian.
Projek nya nyengkaum, Anjung Selera Balingian ti beungkus RM5 juta ke disikap 10 unit kedai makai enggau alai ngirup ke digaga dikena nyendiaka alai bedagang ti kondusif ngagai orang dagang menua kelimpah nyadi palan ditapat pengusung ke nengah sitak nya.
Bela dipenyadi iya nya Palan Dagang Kuala Balingian beungkus RM3 juta ti bisi 20 unit kedai bejual ti berurun agi dikena nambah tikas ekonomi pedagang mit ba kandang ngelingi Kuala Balingian.
Kelimpah ari nya, projek Ngaga Alai Engkah Kerita, Agu enggau Landskap beungkus RM1.5 juta mega digaga dikena nambah pengelantang mensia mayuh sereta ngemanah ka rampa menua pasar Balingian.
Pia mega, projek Nyeleti Pusat Sumber Balingian enggau Opis MDDM ke mungkur pengawa nyeruri sereta nyendia perengkaguna beungkus RM1.5 juta, dikena nambah penyikar meri servis perintah.
Sama datai, Sekretari MDDM Abdul Razak Awang Bini enggau Pegawai Tadbir Kaunsil Pelilih Mit Balingian Abdul Malik Talip.-EDISI UKAS
