“Lampu trafik pintar tu besai amat reti nentuka arus trafik lanchar datai ba Hari Krismas, berundingka penyampau perengka pengangkut ke tama sereta pansut ari Mukah majak nambah sekumbang hari besai nyentuk ujung taun,” ku iya lebuh matau pejalai projek nya, Hari Satu.
Ngena peluang nya, iya meri terima kasih ngagai Opis Residen Bagi Menua Mukah, Kaunsil Pelilih Dalat enggau Mukah (MDDM) ke nyadi agensi pengatur, opis Menteri bekaul ari baruh Opis Menteri Pengangkut (MOT) sereta raban kontraktor ke ransing gawa nentuka projek tu tembu nitih spesifikasyen enggau kualiti ti udah ditetap.
Royston nerang, sebedau tu projek nya napi penanggul ngaul isu kabel dalam tanah enggau utiliti ti begunaka pengawa nyeraris begulai raban Sarawak Energy Supply Corporation (SESCO), tang, kereja ngaga ulih ditampung jampat pengudah isu nya mujur diputar.
Iya mega madah, raban kontraktor udah dipinta nambah manah alai nyidi bepelasarka peneleba pejalai lampu trafik pintar di Simpang Setia Raja, nentuka sistem nyidi perengka pengangkut ulih bejalai lanchar sereta enda nekul pejalai trafik.
Ari projek nya tembu, iya ngarap lampu nya ulih nambah tikas pengelikun jalai alun ba kandang menua nya ti sebedau tu dikelala palan suah endur penusah bebadi nyadi.
Sama datai, Residen Bagi Menua Mukah Datu Kueh Lei Poh, Kepala Polis Pelilih Mukah DSP Muhammad Rizal Alias enggau Sekretari MDDM Abdul Razak.-EDISI UKAS
