KUCHING: Ruang bilik umang ti diau ba Kampung Sungai Maong ti dikejaku empai lama deka dipindah ngagai siti ari flat Kaunsil Pemansang Pengawa Berumah (HDC) di Taman Dahlia.

Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah meri terima kasih ngagai Kaban Kunsil Nengeri (ADUN) Tupong Dato Fazzrudin Abdul Rahman sereta HDC ti deka mantu sida nya.

"Dato Fazzrudin nengah Palan Servis iya deka mayar chengkeram enggau mayar suwa rumah pengelama enam bulan belabuh Januari ngagai Jun taun baru ke alai bulan nangkan nya patut dibayar sida empu,” ku iya.

Iya nyebut pekara nya lebuh dirandau pemberita pengudah pejalai ngabas TTG Kuching, ditu, malam Hari Tiga.

Nya alai, iya ngarap ke sida nya enda masau peluang ti diberi kelebih agi diatu bisi endur diau ti lantang ungkup bala anak.

Berebak enggau nya, Dato Sri Fatimah mega meransang nambiak mit ba ruang bilik nya dianjung ke sekula belabuh taun baru.

Iya nerang, nya nentuka nembiak mit enda ditempaya, likun enggau diberi peluang pelajar seriris enggau Akta Kanak-Kanak 2001.

Ke penerang, semilan ruang bilik nyengkaum enam nembiak mit chukup merinsa pendiau di Kampung Sungai Maong pengudah diburu ari Kampung Gita Laut. -EDISI UKAS

Pemberita: Ahmad Daniel Faiz
Gambar: Muhd Hisyam Arif