KUCHING: Perintah Sarawak terus ransing mutar isu penyeranta nengah pengawa begempung enggau bepuguka pengawa negap ti ngaul mayuh opis menteri enggau agensi, sereta meri perati ngagai penatai pemisi tumbuh meruan enggau ngangkat tikas idup orang umang.
Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah madah, penyeranta nyadi isu ti kompleks lalu enda ulih diputar siti opis menteri aja, laban dibalut mayuh pekara sosioekonomi nyengkaum penatai pemisi, kereja, rumah enggau akses infrastruktur.
Ba baruh opis menteri sida, ku iya, bantu diberi ngagai ruang bilik ti dikategori seranta nengah bemacham skim ngintu pengelantang ninting bulan, kelebih agi ruang bilik ti bisi anak, kelimpah program bukai dikena negap penerima ngambi penatai pemisi sida sebilik nambah meruan.
“Kami pechaya ngagai pengawa negap rayat. Bantu ti disediaka kami ukai semina mantu sida neruska idup aja, tang mantu sida nambah penatai pemisi lalu pansut ari perekuh penyeranta,” ku iya lebuh dirandau pemberita pengudah Pengawa Bejadi Aroma Lab di Metrocity, Matang, Hari Tiga.
Dato Sri Fatimah madah, entara inisiatif ti dipejalai baka meri geran nyentuk RM5,000 ngagai penerima bantu pengelantang dikena mantu aktiviti ngiga belanja, kelebih agi meli kereban.
Iya madah baru, program nya bisi asil positif lalu deka ditampung ba taun 2026.
Iya mega madah, bantu ti diberi ngagai ruang bilik ti betuai ke indu, nyengkaum meri geran dikena mantu sida ngepunka dagang mit, lalu sukung belanja tambah disedia dikena ngerembai dagang enti sema mandangka pemujur.
Berebak enggau nya, Dato Sri Fatimah merambu rumah nyadi komponen beguna dikena munas penyeranta, ari subsidi suwa sereta sukung semua ngaul raban bekuasa lokal mantu orang enggau sida sebilik bisi rumah ti lantang enggau likun.
“Perintah terus ngalus pengawa enggau nuku data penyeranta nengah kerejasama bala tuai komuniti enggau agensi bekaul nentuka bantu diberi ngagai sida ti endang begunaka bantu,” terang iya. -EDISI UKAS
Pemberita: Alezxandria Kapple
Gambar: Alezxandria Kapple & Hisyam Arif
