KANOWIT: Peranak diau ba Jalai Nibong Tada diatu berasai lantang bisi perengka pengangkut ti meruan agi lebuh servius ngepun pejalai, lalu nya nambah akses peranak dia.

Kaban Kunsil Nengeri (ADUN) Ngemah Anyi Jana madah, servis feri nya pengawa semampai dipejalai Perintah Sarawak nambah infrastruktur pengangkut menua pesisir enggau ngemuntang pengawa besehari-sehari peranak.

"Terima kasih ngagai Perintah Sarawak laban udah mutar isu servis feri tu laban pekara tu kebendar suah ditandu agi maya Aum DUN Sarawak.

"Ari servis feri tu deka ngelantangka aktiviti peranak besehari-sehari kelebih agi sida ti diau ba Jalai Nibong Tada," ku iya.

Iya nibar ke jaku nya ba Program Tuai Begulai Enggau Rayat sereta Bejadi Projek Program Transformasi Menua Pesisir (RTP) Nyeruri Rumah Panjai di Rh. Paul Unjong, Nanga Ngungun, ditu, Hari Dua.

Servis feri nya berengkah bejalai kena 24 Disember 2025 ngagai 3 Januari 2026 ari pukul 4.00 pagi nyentuk 12.00 tengah malam, seraya pengudah hari bulan nya, pejalai ditampung ari pukul 4.00 pagi nyentuk 10.00 malam.

Nya alai iya meransang mensia mayuh ti ngena servis feri nya ngasi ke jaku raban operator feri enggau agensi perintah bekaul ungkup pengelikun penguna.

Berebak enggau nya, Anyi mega bisi ngenang pasal Klinik Pengerai Nanga Ngungun ti diatu benung diseruri.
Maya tembu ila, iya ngarap ke nya deka ngelantangka agi penguna ari sukut servis feri, perengkaguna enggau pakar perubat ngagai peranak di Nanga Ngungun enggau menua ngelingi nya.

Berebak enggau nya, Anyi bejadi Projek RTP Nyeruri Rumah Panjai Paul Unjong ti diseruri ngena agih belanja RM120,000 ngena bajet RTP DUN Ngemah enggau dipatau Opis Kereja Raya (JKR) Bagi Menua Sibu nyadi agensi bejalaika projek. -EDISI UKAS