KUCHING: Begulai ngintu hari besai pupu pengarap nyadi pugu nyaga pengelantang enggau penyerakup rayat di Sarawak.

Uskup Agung Kuching Dato Simon Peter Poh madah, budaya pengerami nerima pengabang rayat Sarawaj mujur ngerapit kaul entara raban bansa nadai ngira pengarap.

“Di Sarawak, kitai serurai begulai ngintu hari besai baka Aidilfitri, Ramadan, Deepavali, Wesak, Guru Nanak enggau Krismas.

“Pengawa begelumu, makai serumpu enggau bekunsi pengaga ukai semina ngerapit kaul aja, tang nyadi pelasar narak pengelantang, pengelikun enggau kerejasama ungkup pemaik semua rayat Sarawak,” ku iya.

Iya nibar ke jaku nya ngagai pemberita lebuh dirandau ba Pengerami Nerima Pengabang Krismas diatur Gerija Katolik di ACCPC St Joseph Church, ditu, Hari Empat.

Ku Dato Simon, pengerami Krismas diintu mai pesan pengelantang enggau niat manah ti patut dipandang ba pengidup besehari-sehari ungkup pengelantang begulai.

Berebak enggau nya, iya mega meransang bala tuai politik enggau pengarap ba renggat global besaup mutar penyarut enggau naka ulih ngadaka pengelikun.

Iya madah, Sarawak siti nengeri ti diberekat enggau tuai ti berati ke pengelantang entara pengarap, lalu ngasuh semua raban nya idup bebaik dalam pengelikun sereta bebasa ke pangan diri.-EDISI UKAS

Pemberita: Nur Nabilla
Gambar: Nur Nabilla