MUKAH: Tradisyen ngabang Krismas nya entara pengawa nyelai ba Malaysia kelebih agi ba Sarawak ti mandang penyerakup pupu bansa.
Kaban Kunsil Nengeri (ADUN) Tellian Royston Valentine madah, pengawa tu ukai semina aktiviti sosial tang mega nyadi pugu narak penyerakup enggau pengandal entara rayat sereta perintah.
“Pengawa ngabang tu nyeremin pemanah kaul rayat Sarawak ti semampai idup dalam semangat beserakup,” ku iya lebuh dirandau ba Pengerami Ngelalu Pengabang ba rumah iya kena Hari Empat.
Nengah tradisyen nya, ku iya, rayat nadai ngira raban bansa enggau jalai pengarap bela ngabang makai bemacham pemakai nyelai baka kek lapis enggau manuk panggang, bekunsi pengaga sereta ngedut kaul entara pangan diri.
Nya alai, Royston ngarap tradisyen baka tu deka terus dijaga enggau ditampung nyadi lambang peneguh komuniti Sarawak ti seati, likun enggau bela bebasa ke pangan diri seraris enggau juluk pemansang nengeri ti inklusif enggau lantang. - EDISI UKAS
