Abdul Yakub, Royston Ngaul Komuniti Mukah Serimbai Krismas
MUKAH: Penatai Kaban Kunsil Nengeri (ADUN) Balingian Abdul Yakub Arbi enggau ADUN Tellian Royston Valentine ba sebengkah pejalai ngabang Krismas kena Hari Lima nunjukka pemanah tuai nya ngaul rayat nadai ngira raban bansa enggau jalai pengarap.
Pejalai ngabang ngagai sekeda endur ngelingi sitak Kunsil Nengeri (DUN) Tellian enggau DUN Balingian nya ukai semina ngerichah pengerami tang mega nyadi awak ngerapit kaul sereta komunikasyen entara tuai enggau komuniti lokal.
Ku kededua tuai nya, penatai sida lambang begulai ngerichah pengerami seraya meri kelai nyata senentang serap komuniti semampai dikenang enggau enda dikelaung ba arus pemansang nengeri Sarawak ti deras.
Ku iya, pengawa ngabang serimbai pengerami pupu pengarap nya pelasar beguna mendingka sada rayat.
Abdul Yakub enggau Royston mega nyemetak madah, pupu bansa enggau jalai pengarap ba Mukah ukai nyadi siti penekul tang nyadi pengelebih ti meseti dijaga nentuka pengelantang enggau penegap sosial terus dijamin.
Kelimpah ngerami raban orang Kristian, penatai kededua ADUN nya nyeremin reti bebatak asur sereta semangat beserakup ti nyadi pun pengidup komuniti ba Sarawak.
