FTES Ngubah Landskap Pelajar Tinggi Sarawak, Ngelempung Tating Belanja Nembiak
KUCHING: Skim Pelajar Tinggi Pechuma Sarawak tauka Free Tertiary Education Scheme (FTES) nyadi siti inisiatif besai ti ulih ngubah landskap pelajar tinggi ba nengeri tu kelebih agi nyaup anak Sarawak nampung pelajar enggau nadai penanggul belanja.
Siku pengereja kompeni, Aliah Najwa, madah ke FTES nya siti inisiatif engkeman ba sistem pelajar nengeri.
Ku iya, skim nya nyendia besai agi peluang ngagai raban nembiak ti sebedau tu apin deka nampung pelajar ketegal suntuk belanja.
“Nengah pemisi skim tu deka meri akses ngagai pelajar, peluang ngansah pengelandik enggau penemu sereta awak ngubah tikas idup.
“Aku pechaya, genap orang meseti bisi peluang ti sebela ba pelajar,” ku iya lebuh dirandau pemberita Unit Komunikasi Awam Sarawak (UKAS) kena Hari Lima.
Nangkan nya, siku da pengereja kompeni, Mohd Fikri Napri, nerima manah inisiatif Perintah Sarawak ti nyendia skim pelajar tinggi pechuma ungkup universiti enggi perintah nengeri.
Ku iya, FTES meri pengelantang kelebih agi ngagai nembiak menua pesisir ti sebedau tu napi pemar ungkus pengidup enggau akses ngagai mengeri.
“Inisiatif tu mayuh mantu anak Sarawak nampung pelajar ngagai renggat universiti.
“Tu siti inisiatif ti dikenang kami lalu arap ke ulih dikerembai ngaul mayuh agi institusyen pelajar tinggi,” terang iya.
Iya mega ngelalau raban nembiak anang ngasai ke pemar nyadi penekul nampung pelajar tang ngena manah peluang ti udah disedia perintah.
“Pelajar nya kuasa. Penemu ulih ngubah pengidup enggau tikas idup.
“Kelimpah universiti, bisi mega institusyen pengelandik ti ulih nyadi pelasar nempa pemansang menyana agi,” ku iya.
Nambah ke nya, siku pengajar, Ixora Kaylyn, madah ke FTES nyadi ‘game changer’ngagai rebak biak Sarawak.
Ku iya, skim tu ukai semina mantu nembiak ari mayuh penatai tang mega ngelempung tating belanja apai indai.
“FTES meri peluang ti asi ngagai genap anak Sarawak ngambi belajar enggau nadai penekul isu belanja.
“Tu mega pengawa meranak puku timpuh panjai dikena nempa pengereja landik ti sedia nyungkak ekonomi nengeri,” ku iya.
Pengawa bejalaika FTES dipeda nyadi siti inisiatif berani Perintah Sarawak nentuka akses pelajar tinggi ti inklusif enggau sebela agi ungkup pemansang nengeri ti meruan agi. - EDISI UKAS
Pemberita: Nur Nabilla & Alezxandria Kapple
Gambar: Nur Nabilla & Alezxandria Kapple
