KUCHING: Sepenyampau 333 penyereta tama Pekit Ping Pong Entara Bagi Menua Sarawak Ke-63 ti diatur ba Sekula Primari China (SJK) Chung Hua No. 3 kena Hari Enam.
Pemangku Tuai Pegawai Eksekutif Kaunsil Lumba Sarawak (SSC) Khairul Nizam Morshidi madah, penyereta ari semilan bagi menua iya nya Kuching, Samarahan, Serian, Betong, Sarikei, Sibu, Mukah, Bintulu enggau Miri.
Ku iya, bisi 25 pekit diatur nyengkaum kategori khas ungkup Bumiputera seraya nyeremin peluang sebela ngagai semua.
“Pekit tu nyadi pelasar beguna ngemau semangat belumba, disiplin enggau penyerakup entara staf mayuh bagi menua ba Sarawak seraris enggau pengawa ngemeran gaya idup bepengerai enggau aktif,” ku iya.
Iya madah munyi nya nengah teks jaku ti dibacha Tuai Unit Lumba SSC Mohamad Ikmal Afandi lebuh bejadi pekit nya.
Khairul mega madah, pekit nya sebagi ari pelasar beguna ngagai atlit longlist SUKMA Sarawak besikap napi SUKMA 2026.
Nya alai, iya ngarap pekit tu ulih ngemau semangat bala penyereta bebendar belatih ba palan latih sida seraya ngansah pengelandik enggau penau diri dikena ngangkatka Sarawak nyadi kuasa lumba ping pong ba renggat nasional.
Sama datai, Sapit Presiden Gerempung Ping Pong Sarawak (TTAS) Alvin Wong enggau Chairman TTAS Bagi Menua Samarahan ti mega tuai pengatur pekit, Siman Ngu Meng Tong. -EDISI UKAS
