Presiden Datus United FC Ngemerat Disiplin, Pengawa Beraban & Tuju Bepekit
SRI AMAN: Disiplin tinggi, pengawa beraban ti entap enggau tuju bepekit ti nemban meseti nyadi perati besai Datus United FC napi Petronas Youth Football Championship League 2025 ti deka diatur ba Kuching minggu baru.
Presiden nya, Awang Putrayusrie Awang Redzuan madah, pemujur ba pekit nya ukai semina bepanggai ngagai pengelandik individu pemain tang mega begunaka komitmen ari semua tim nyengkaum bala jurulatih enggau raban pengatur pengawa.
“Disiplin ba dalam enggau luar padang, semangat beraban sereta nyapai juluk ti udah ditetapka nya kunchi nyapai pemutus ti ngemegah.
“Aku deka semua pemain bemain nyadi siti tim lalu mai nama Datus United FC enggau penuh tanggungpengawa,” ku iya ba simbolik nyua 'armband' ngagai tim kena Hari Lima.
Iya mega ngarap pekit nya ulih dikena nyadi pelasar nambah pemujur, nempa pengandal diri sereta nempa runding nyadi champio ba pemain biak.
Ku iya, pengawa besikap enggau pengeransing dikeandal ulih ngasuh sida bepadan enggau manah ba pekit nya.
Nangkan nya, Residen Bagi Menua Sri Aman, Mahra Salleh mega datai ngulu pengawa begambar begulai enggau tim sereta simbolik nyua‘armband’tim kelai sukung enggau peransang ngagai bala pemain ti deka bepekit.
Iya mega nangkan bala pemain semampai nyaga manah nama Sri Aman enggau tim sepanjai tim ti diatur enggau ngemerat disiplin, semangat belumba sereta ulah profesional ba dalam enggau luar padang.
“Genap pemain mai nama Sri Aman enggau tim, nya kebuah bemain mih enggau manah, disiplin sereta mandang penyulut.
