SRI AMAN: Kaban Kunsil Nengeri (ADUN) Lingga, Dayang Noorazah Awang Sohor meri peransang ngagai tim Datus United FC sebedau bekejang ngagai Kuching ngambi tama Petronas Youth Football Championship League 2025 ba sebengkah pengawa ba Terminal Bas Sri Aman kena Hari Lima.

Nerang pandak, Dayang Noorazah ngelalau bala pemain ngena peluang tama pekit nya lalu bemain enggau manah, disiplin sereta mandang semangat belumba.

Ku iya, genap pekit nya nalan belajar ti beguna nempa mentaliti, peneguh fizikal sereta penuai runding pemain biak.

“Menang tauka alah nya utai ti endang nyadi ba lumba tang pekara ti beguna iya nya disiplin, ulah enggau pemesai retu ti dibai ba bala pemain ba dalam enggau luar padang.

“Semua kita mai nama kelab, ruang bilik sereta nama Simanggang,” ku iya.

Dayang Noorazah mega meri tabi puji ngagai raban pengatur kelab, bala jurulatih sereta apai indai ti semampai meri sukung ngagai pemansang lumba bol nembiak ba sitak nya.

Ku iya, insiatif ngansah enggau ngembing pemain biak meseti ditampung dikena nempa atlit ti ukai semina nyulut ba lumba tang mega sebela ari sukut akademik enggau pemereti ati.

Nambah ke nya, iya mega ngemerat pemesai guna nempa pemereti ati sereta peneguh pengarap ba bala pemain.

Ku iya, penyebela entara fizikal, runding enggau spiritual nya elemen beguna dikena nempa atlit ti besemekih sereta manah ati.

“Aku ngarap bala pemain semampai nyaga ulah, ngasi ke atur pekit enggau netapka pekit nya nyadi pelasar nambah peneleba sereta penyulut sida,” ku iya nyemetak. - EDISI UKAS