209 Rumah Renggat Keterubah Sungai Berdaun Nyau Deka Diuan Pengempu
KUCHING: Projek Rumah Sungai Berdaun ngaul 209 unit rumah ungkup renggat keterubah diatu nyau deka diuan peranak.
Menijar Kanan Pekara Korporat Kaunsil Pemansang enggau Pengintu Tanah (LCDA) Saiful Bahari Amra Ramly madah, rumah nya disedia ngagai tuai bilik tambah ari Projek Darul Hana ti diberi peluang ngembuan rumah kediri.
“Ungkup 209 rumah renggat keterubah nya nyau deka diuan peranak kelebih agi tuai bilik tambah ari Projek Darul Hana, ti diberi peluang dikena meli rumah ba Sungai Berdaun,” ku iya.
Iya madah munyi nya lebuh dirandau pemberita ba Fiesta Bowling LCDA Begulai Enggau Media 2025 di Megalanes Sarawak, Batu Kawa ditu kena Hari Enam.
Saiful Bahari nerang, renggat kedua Projek Rumah Sungai Berdaun ditaga belabuh taun baru tang nya bepanggai ngagai pekara ti nyadi diatu.
Ba lansa sama, iya nerang, sekeda projek Skim Nangkir Genturung Pendiau (SPK) bukai mega benung digaga ba Gedong, Sebuyau enggau Lawas ke alai sekeda projek ditaga tembu taun baru.
Ku iya, semua projek rumah nya sebagi ari inisiatif betampung LCDA dikena nyaup Perintah Sarawak nyendia rumah ulih dibeli kelebih agi ruang bilik ti apin bisi rumah kediri.
Ku iya, LCDA bekerejasama rat enggau mayuh agensi nyengkaum Opis Tanah enggau Survei, Kaunsil Pemansang Berumah (HDC) sereta Mutiara Mortgage nentuka genturung ti digaga disikap fasiliti pemun, utiliti enggau infrastruktur.-EDISI UKAS
