Fiesta Bowling LCDA Begulai Enggau Media Mekuh Kerejasama Strategik
KUCHING: Kaunsil Pemansang enggau Pengintu Tanah (LCDA) ngatur Fiesta Bowling LCDA Begulai Enggau Media 2025 nyadi sebagi ari chara mekuh kaul kerejasama strategik entara agensi nya enggau bakih media ba Megalanes Sarawak Batu Kawa, ditu kena Hari Enam.
Tuai Pegawai Eksekutif Puncak Borneo Development Sdn Bhd (PBDSB) Zuraimy Kushaili ti ngari ke Menijar Besai LCDA madah, program nya nyadi pelasar ngerapit kaul profesional entara pegawai LCDA enggau pemekuh media.
Ku iya, kerejasama rat entara LCDA enggau media engkeman amat nentuka pengawa bekunsi penerang ti betul ngagai mensia mayuh kelebih agi ba jeman penerang jampat dikerembai.
“Tang, pekara ti beguna ba kitai iya nya nengah kerejasama rat enggau bakih media, kitai pechaya penerang ti dikenatai meseti betul enggau nitih tuju.
“Kelebih agi kitai enggai penerang ti enda betul nya dikenatai,” ku iya lebuh dirandau pemberita ba program nya.
Ku Zuraimy, program nya digulu urung 70 ngagai 80 penyereta ari sekeda agensi media baka Unit Komunikasi Awam Sarawak (UKAS), Kuching Division Journalists Association (KDJA), Sarawak Media Group (SMG) enggau agensi media bukai sereta staf LCDA.
Sama datai, Menijar Kanan Pekara Korporat LCDA Saiful Bahari Amra Ramly.-EDISI UKAS
