MERADONG: Pengerami diintu ukai semina pengawa asal tauka ngerami pengarap aja, tang nyadi pelasar beguna narak ulah bebatak asur, pemereti ati enggau kaul bebaik rayat pupu bansa enggau jalai pengarap.
Nya alai Kaban Kunsil Nengeri (ADUN) Meradong, Datuk Ding Kuong Hiing madah, iya semampai nyukung progam ngaul komuniti enggau main asal ti diatur serakup menua nya, kelebih agi ngaul penyerakup rayat pupu bansa enggau jalai pengarap ba sitak Meradong enggau kandang ngelingi.
“Aku meri terima kasih ke pengeregas bala kita ngatur aktiviti ti ukai semina ngelati budaya enggau pengawa asal aja, tang mega negap kaul begulai enggau pemereti ati entara komuniti,” ku iya.
Iya nibar ke jaku nya ba Pengerami Ngintu Krismas diatur Serakup Liu Kwee Tang Kandang Menua Tengah Sarawak ba siti restoran, ditu, Hari Enam.
Kelai sukung, Datuk Ding mega ngemendarka Geran Khas Projek Mit Pemansang Menua Pesisir (MRP) penyampau RM5,000 ngagai diatur Serakup Liu Kwee Tang Kandang Menua Tengah Sarawak dikena nyukung sida ngatur aktiviti sepanjai taun serakup nya ba taun 2026.
Ku iya, pemeri nya dikearap ulih mantu serakup merambu enggau ngatur program ti berurun agi, meri empas enggau pemaik ngagai bala kaban serakup sereta peranak dia.
Iya mega nyemetak madah ke diri ti nyadi pengari rayat deka terus nyukung serakup enggau gempung ukai dikuasa perintah (NGO) ti regas gawa ke pemansang modal mensia, main asal enggau pengelantang komuniti ba sitak Meradong. -EDISI UKAS
