Sapit Premier Sarawak Datuk Amar Douglas Uggah Embas madah, nya nyadi pekara ti beguna endar dikena nanggam kaul tegut entara rayat enggau bala tuai.
“Tu mega deka ngemuntangka pejalai mayuh agi inisiatif pemansang ungkup pengelantang rayat ba sitak Bukit Saban," ku iya ba Pengerami Nerima Pengabang Krismas Taun 2025 Renggat Sitak Kunsil Nengeri (DUN) N.37 Bukit Saban di Balai Komuniti Spaoh kena Hari Enam.
Berebak enggau nya, Datuk Amar Douglas madah, tuju pengerami nerima pengabang Krismas ti diatur nya dikena negapka agi semangat begulai bebaik enggau ngerapit kaul entara bala tuai enggau rayat, sereta ngerami hari besai dalam pengelantang enggau bebasa ke pangan diri.
Ku iya, bala pengabang ti datai bisi peluang berandau enggau bala tuai sereta nyepi pemakai ti dinah, ngasuh pengerami nya nyadi pelasar ti nemban dikena negap penyerakup komuniti nadai ngira bansa enggau pengarap.
Sama datai, Kaban Parlimen Betong Dato Dr Richard Rapu, Sekretari Politik Premier Sarawak Roseline Mapong Sabai, Pegawai Pelilih Betong Laga Kueh sereta temuai dipebasa bukai. -EDISI UKAS
