MIRI: Balai Dagang Bumiputera Sarawak (DUBS) Pampang Miri deka ngatur Miri Art Festival 2.0 (MAF 2.0) berengkah ari 31 Disember 2025 nyentuk 4 Januari 2026 di Stadium Tetutup Miri, serimbai ngintu Mantar Taun Baru 2026.

Pengerami nya dikeandal nyadi pelasar besai ngangkatka seni, budaya enggau pengawa dagang lokal ari ngatur pemandang main asal ngaul tujuh etnik di Miri, iya nya Serakup Leto Kenyah Miri, Serakup Indu Telang Usan, Serakup Jatti Mierek Miri, Serakup Melayu Miri, Serakup Melanau Miri, Serakup Berawan Miri enggau Serakup Penan Miri.

Semua serakup tu deka begempung bepuguka elemen seni, pemakai asal sereta ngepan asal diri empu ngambi bepekit ngerebut perais mata duit RM3,000.

Kelimpah ari nya, MAF 2.0 mega richah enggau Pekit Tanda Fusi ti nyendiaka perais RM6,000, dipasuk laban raban tanda ti ngempung elemen asal enggau kontemporari, baka Kenyalang Ritma Dancer, Unity Dance Academy, Seni Kenyalang, Gah Rentak Art & Culture sereta Tunas Tari Warisan.

Bala ti rindu ke kulinari, pengerami tu mega bisi ngatur “Black Box Cooking Competition” ti matak 20 raban ngujika kreativiti penyereta nyumai pemakai ngena utai ti semina deka ditemu sebedau pekit belabuh diatur.

Batang pengerami kena malam 31 Disember 2025 deka meda pengawa ngintu penatai Taun Baru 2026 ti richah enggau pemerindang ari artis tebilang menua nyengkaum Ayai Ilusi, Sharman, Nizarddin, Adik Abbiy sereta Bobby.

Berebak enggau nya, DUBS Pampang Miri nesau peranak Miri enggau kandang menua semak sampal datai ngerichah Miri Art Festival 2.0 ti ukai semina pengawa beperindang aja, tang nyadi palan ngintu pesaka budaya sereta nyukung pengawa orang dagang lokal.-EDISI UKAS