DARO: Program bepuguka pengerai baka Je’ulo Run ukai semina ulih ngeraika batang tubuh aja, tang mega ngerapit kaul enggau negap penyerakup peranak dia.

Kaban Parlimen Igan Ahmad Johnie Zawawi madah, pemanah timbal diterima ba program nya mandangka peranak nyau ngeledaka pemesai guna ngemeran gaya idup bepengerai ti ngaul serap umur.

“Aku chukup temegah meda pemanah timbal diterima ari komuniti serap umur.

“Tu mandangka nyau mayuh rayat ngeledaka pemesai guna ngemeran gaya idup bepengerai,” ku iya lebuh bejadi flag off Je’ulo Run 3.0 Opis Pelajar Pelilih (PPD) Daro 2025 diatur richah ba Jematan Nanga Lassa, ditu, Hari Enam.

Bisi 1,115 penyereta ngambi bagi ba program edisyen ketiga nya, ngaul bala penyereta ari Dalat, Mukah, Sibu, Sarikei enggau Kapit, kelimpah peranak diau ngelingi Daro.

Ku iya, pengawa milih Jematan Nanga Lassa nyadi endur ngatur program chukup engkeman laban nya lambang pemansang infrastruktur menua pesisir sereta dikemegah rayat ba sitak Daro.-EDISI UKAS