MERADONG: Sepenyampau 96 nembiak Primari 6 ti deka tama sekula sekondari nerima bantu uniform enggau kasut sekula ba siti pengawa nyua bantu diatur ba sitak Meradong, Hari Satu.

Bantu nya datai ari pemeri Sapit Menteri Kebun Dandang Besai enggau Komoditi ti mega Kaban Parlimen Sarikei Dato’ Sri Huang Tiong Sii, kelai siti ari pengawa ngintu pengelantang nembiak ba sitak dipegai iya.

Pengawa nyua bantu nya udah diatur nengah pejalai Tim Palan Servis Pengari Rayat ngagai sekula ti nerima nentuka pemeri khas nya diterima nembiak ti patut.

Ku Dato’ Sri Huang ti mega Kaban Kunsil Nengeri (ADUN) Repok, tuju inisiatif nya ngelempung tating belanja apai indai, kelimpah nyadi peransang ngagai nembiak bepungkal sekula enggau ati ti andal.

Iya madah, bantu baka nya udah ditandu belama kenyau ari 2019 nentuka bala nembiak ba sitak Repok nerima bantu nitih pematut, kelebih agi nyendiaka kereban dikena besekula/

“Bantu tu sebagi ari pengawa aku negap pengelantang nembiak ba sitak Parlimen Sarikei.

“Aku ngarap ke pemeri tu ulih nyadi peransang ngagai bala nembiak bepungkal sekula baru enggau lantang sereta bisi pengandal,” ku iya.

Iya mega ngarap ke bantu ti diberi nya dikena manah enggau nyadi peransang ngagai nembiak ransing agi ngulihka penyulut ba akademik enggau ngemansangka diri.

Pengawa nyua bantu nya ngaul nembiak ba sekeda sekula baka SK St Augustine, SJKC Ming Chiang, SJKC Kai Sing, SJKC Tung Kwong, SK Sungai Kawi, SJKC Yong Kwong, SK Tulai, SJKC Kung Cheng, SJKC Tong Hua, SJKC Nang Hua, SJKC Yong Cheng, SJKC Ming Shing, SK Sungai Sian enggau SK Tanjung Bundung.-EDISI UKAS