Menteri Dagang Temuai, Seni enggau Budaya Malaysia, Dato’ Sri Tiong King Sing madah, sektor dagang temuai terus mandangka penyulut ari penyampau temuai ti datai naka bulan Oktober nyentuk November ti nyau deka 80 juta, jauh ngelui ari penyampau taun sebedau nya, ngelui ari taga terubah urung38 juta temuai.
Ku iya, Malaysia bisi juluk nerima manggai RM300 juta ari asil bekaul dagang temuai.
“Fingers crossed, kitai ngarap ke manggai 2026, Malaysia ulih matak lebih ari 40 juta temuai antarabansa,” ku iya ba aum media serimbai Sibujaya Countdown 2025 di Azman Hashim Community Sports Centre kena Hari Satu.
Ngenang pekara diselinting VM2026, Dato’ Sri Tiong nyemetak madah ke pemesai guna narak penyerakup enggau pengelantang nasional.
Iya meransang rayat Malaysia bebasa ke budaya enggau pengarap pangan diri sereta nyeliah isu main asal ti diangkat nyadi polemik politik tauka pengarap.
Ngenang pengawa sehari nya, Kaban Parlimen Bintulu nya madah, pengawa ngatur program baka Sibujaya Countdown 2025 nyadi pelasar besai ngelaku budaya, pemakai asal, pemerindang seni, kaul nembiak enggau aktiviti moden baka e-lumba, lalu nya mandangka pengelain enggau inklusiviti rayat Malaysia.
“Ba pengawa ngelaku pemakai enggau pesaka budaya, aku meransang semua raban bansa enggau nengeri sama mandangka identiti diri empu, nyengkaum pemakai Melayu, Iban, Bidayuh, China enggau ke bukai, ngambi temuai ulih mereti ke enggau bebasa ke pengaya budaya menua,” ku iya. -EDISI UKAS
