SADONG JAYA: Lumba Rama Kampung Tanjung Kelaso diatur nyadi pelasar ti nemban negut pemanah kaul enggau narak semangat penyerakup sereta kerejasama ba peranak menua nya.

Kaban Kunsil Nengeri (ADUN) Simunjan, Awla Dris madah ke program baka nya ukai semina nyadi aktiviti belepa aja, tang pelasar negut kaul sosial ti positif, kelebih agi ngembing rebak nembiak ngaul komuniti ti bepengerai enggau bisi pemaik.

“Aktiviti lumba rama nyadi pelasar pemadu manah ti ngempung komuniti ari serap umur, kelimpah narak pemanah ulah baka ransing ba lumba enggau main, disiplin enggau bebatak asur,” ku iya.

Iya nyebut jaku nya nengah teks jaku dibacha Pegawai Khas, Raffendy Ariffen, serimbai Pengawa Bejadi enggau Nangguh Lumba Rama Kampung Tanjung Kelaso ti diatur richah di Padang Futsal Kampung Tanjung Kelaso, Hari Dua.

Ku Awla, program baka nya meri peluang ngagai peranak menua berandau betunga mua, lalu negap kaul entara rebak biak enggau orang besai tuai dalam pengelantang.

Berebak enggau nya ku iya, Palan Servis ADUN N.25 Simunjan seruran nerima penatai rayat ungkup pengelantang begulai, kelimpah ngarap ke rebak biak enggau indu terus ditegap ba program ngaul komuniti dudi hari.

Awla nyemetak madah, pemujur kebendar siti-siti program ukai dipeda sapa ti menang bepekit aja, tang ari semangat segulai sejalai enggau penyerakup ti mujur ditarak sekumbang program diatur. -EDISI UKAS