KUCHING: Pemidang penganalisis ekonomi tebangkar nama, Prof Madya Dato Dr Madeline Berma pengelenyau besai ngagai menua, kelebih agi Sarawak.

Sekretari Perintah Sarawak Datuk Amar Mohamad Abu Bakar Marzuki madah, niang udah mayuh jasa ngagai menua kelebih agi ba bidang pelajar tinggi, pansik enggau pemansang penemu, nyengkaum berundingka polisi sereta jerana pemansang ekonomi.

“Pemidang niang pengelenyau besai ngagai menua, kelebih agi Sarawak, ketegal jasa besai iya ba bidang pelajar tinggi, pansik enggau pemansang penemu, nyengkaum berundingka polisi sereta jerana pemansang ekonomi,” ku iya.

Iya nibar ke jaku nya ba siti penerang Hari Dua.

Ngari ke Servis Perintah Sarawak, iya meri penyinu ati ngagai sida niang sebilik.

Dato Dr Madeline midang ba umur 64 taun di rumah iya di Bandar Baru Bangi, pukul 11.30 pagi tadi.

Niang asal ari Kuching nya siku tokoh ekonomi ti udah mayuh jasa ba pemansang ekonomi, ukai semina ba Sarawak aja, tang renggat nasional.

Iya dichiri nyadi Pesuruhjaya Sarawak di Suruhanjaya Hak Asasi Manusia Malaysia (Suhakam) enggau nyadi orang Iban terubah mangku pengawa nya.

Kelimpah ari nya, Dato Dr Madeline ti mega kaban Kaunsil Pengatur Ekonomi Sarawak (SEAC) ti dichiri Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg bulan Januari nyin tadi ngambi mantu ngelanggur ekonomi nengeri.

Iya mega mangku sekeda pangku pengawa perunding enggau nyadi kaban komiti nasional perintah nyengkaum Kaunsil Penyanding Penemu Indu sereta mayuh pangku pengawa perunding polisi ba renggat Perintah Besai.

Niang mega tebilang nyadi penganalisis ti suah endur raban media betanya ngulihka sadang penemu ti menyana sereta analisis komprehensif pasal isu ekonomi enggau pemansang.

Ku anak menyadi niang, Basil Cliffton Calvert, tubuh Dato Dr Madeline deka dibai pulai ke Kampung Siol Kandis, Kuching ungkup pengawa rabat. -EDISI UKAS