KUCHING: Penganalisis ekonomi Prof Madya Dato Dr Madeline Berma midang ba umur 64 taun ba rumah iya di Bandar Baru Bangi, pukul 11.30 pagi tadi.
Berita nya dituku anak menyadi niang, Basil Cliffton Calvert lebuh dirandau Bernama sehari tu.
Calvert mega madah ke tubuh niang deka dibai pulai ke Kampung Siol Kandis, Kuching ungkup penusah rabat.
“Pekara tu agi dikerandau tang enti semua pengawa lanchar, engka tubuh niang deka dibai pulai pagila,” ku iya.
Calvert madah, Dato Dr Madeline Berma ditepan penyakit buah punggung lalu benung berubat dialisis taja pun pemati empai ditemu.
Dato Dr Madeline Berma asal ari Kuching siku tokoh ekonomi ti udah mayuh jasa ba pemansang ekonomi, ukai semina ba Sarawak aja, tang mega renggat nasional.
Iya dichiri nyadi Pesuruhjaya Sarawak di Suruhanjaya Hak Asasi Manusia Malaysia (Suhakam) enggau nyadi orang Iban terubah mangku pengawa nya.
Kelimpah ari nya, Dato Dr Madeline ti mega kaban Kaunsil Pengatur Ekonomi Sarawak (SEAC) ti dichiri Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg bulan Januari nyin tadi ngambi mantu ngelanggur ekonomi nengeri.
Iya mega mangku sekeda pangku pengawa perunding enggau nyadi kaban komiti nasional perintah nyengkaum Kaunsil Penyanding Penemu Indu sereta mayuh pangku pengawa perunding polisi ba renggat Perintah Besai.
Niang mega tebilang nyadi penganalisis ti suah endur raban media betanya ngulihka sadang penemu ti menyana sereta analisis komprehensif pasal isu ekonomi enggau pemansang.
