SIBURAN: Pelajar elemen beguna dikena nyungkak Sarawak nuju ekonomi baru iya nya ekonomi gadung.
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, Sarawak diatu chakah nempa pengereja bepenemu ba Sains, Teknologi, Matematik enggau Injiniring (STEM) ukai semina ba degree aja, tang mega landik teknikal ungkup industri.
“Sarawak diatu nuju ekonomi baru iya nya ekonomi gadung laban kitai deka nyaup dunya ti beresi enggau gerai agi.
“Nya kebuah kitai ngemansangka teknologi hidrogen nyadi kereban api gadung. Kereban mata iya nya ai, lalu kitai bisi mayuh pemansut tu.
“Taja pia, ai aja enda chukup, kitai begunaka penemu dikena nyerara hidrogen enggau oksigen ngambi ulih ngasilka kuasa gadung nya,” ku iya lebuh bejaku ba mua mayuh rambau Home & Future Night 3.0: Ngintu Taun Baru 2026 ba Pelaman Besai Tokong Shui De Xing Jun, Tapah, Hari Satu.
Iya madah, nya mih kebuah menua luar ngangauka Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg bekunsi penemu pasal pemansang ekonomi gadung ukai semina ba Asia aja, tang mega menua Barat.
Iya nerang, semua nya semina ulih dijapai nengah pelajar laban Sarawak begunaka mayuh agi graduet enggau pemekuh STEM dikena nempa pemujur dudi hari.
Seraya Kaban Kunsil Nengeri (ADUN) Tarat nya madah baru, Sarawak mega nyelai laban diuan pupu bansa enggau pengarap tang bela bebasa ke pangan diri.
Iya mega nerang, penyelai nya ngasuh semua raban bansa nadai ngelui ari pangan diri tang semampai bekerejasama nempa Tanah Kenyalang menyana dudi hari. -EDISI UKAS
