KUCHING: Taun baru 2026 patut nyadi jalai ngagai semua rayat Sarawak ngentap juluk, ngatur manah pengawa enggau nentuka tetiap perambu enggau pengawa bisi asil ti meri pemaik begulai.
Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar mega nyemetak madah ke pemesai guna semangat segulai sejalai, bebasa ke pangan diri sereta nyaga pemanah kaul entara komuniti nyadi pugu penegap, pemansang enggau pengelantang nengeri.
“Taun bar utu mega dikearap nyadi peluang kitai belemati kediri, narak asai terima kasih enggau nyingkang ke mua ngena juluk ti entap agi ungkup pemujur Sarawak sereta rebak dudi hari,” ku iya ba pesan khas serimbai Ngintu Taun Baru 2026 kena Hari Tiga.
Tun Pehin Sri Dr. Wan Junaidi enggau Toh Puan Datuk Patinggi Fauziah Mohd Sanusi mega meri selamat taun baru ngagai semua rayat Sarawak, disempulang enggau sampi taun deka datai mai pengelantang, tunga kuing ti nyengala enggau pengeliat ati ngagai komuniti.
Iya mega besampika semua rayat Sarawak diberi pengerai, pengelantang ba pengidup diri sebilik, pemujur ba tetiap pengawa sereta diau likun enggau lantang belama.-EDISI UKAS
