KUCHING: Infrastruktur, pelajar enggau pengelantang terus diselinting Perintah Sarawak seriris enggau Strategi Pemansang Pengudah COVID-19 (PCDS) 2030 ti nyadi penyungkak pemansang nengeri ba jeman pengudah pandemik.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, sepanjai taun 2025 udah meda pemansang ti nyengala ba pemansang sosioekonomi ti mai pengelantang ngagai rayat.

Ku iya, lebih 1,000 kilometer jalai alun baru enggau diseruri udah tembu nyengkaum projek Jalai Besai Pan Borneo ti diatu udah tembu menyana, ngasuh pejalai likun enggau jampat agi sereta ngerandang ekonomi tumbuh ba kandang mengeri enggau menua pesisir.

“Kualiti idup rayat mega diangkat nengah bekal ai beresi, bungkur bekal kuasa karan enggau arus internet ti majak besai.

“Transformasyen digital disungkak nengah palan data diaku tikas antarabansa, bekenaka artificial intelligence (AI) enggau ‘cloud’, sereta sistem e-perintah ti sikar enggau ngelantangka penguna,” ku iya ba pesan khas serimbai Ngintu Mantar Taun Baru 2026 kena Hari Tiga.

Premier Sarawak madah baru, pemansang modal mensia nyadi pugu pemansang nengeri nengah latih Pelajar enggau Latih Teknikal enggau Vokasional (TVET), meri sekularship enggau Skim Pelajar Tinggi Pechuma Sarawak (FTES) berengkah 2026 ti meri akses pelajar bisi kualiti ngagai anak Sarawak enggau enda ditekul belanja.

Kelimpah ari nya ku iya, Perintah Sarawak deka nampung inisiatif Bantu Diguna Pemun Sarawak (SKAS) ngena agih belanja besai agi, iya nya RM640 juta ba taun baru dikena ngelempungka tating belanja idup.

Iya mega madah, Perintah Sarawak terus ransing ngintu kampung, sungai enggau biodiversiti sereta negap pemansang kuasa beresi nentuka pemeruan rampa menua asal terus tejaga ungkup rebak dudi. -EDISI UKAS