KUCHING: Projek mitigasyen bah Sungai Sarawak Bypass deka diperambi bepun ari Batu Kawa dibanding ari Tasik China Selatan.

Sapit Premier Sarawak Datuk Amar Prof Dr Sim Kui Hian madah, projek mitigasyen beungkus lebih RM2 bilion nya asal suba dipun ari Tasik China Selatan.

Iya madah ke diri deka berandau enggau Sapit Menteri Besai Datuk Amar Fadillah Yusof ngambi projek nya dipun ari Batu Kawa kili lalu ukai ari Tasik China Selatan kulu baka diatu/

“Enti projek tu enda dipun enggau chara ti betul, ukai semina sitak Batu Kawa deka ampuh tang sitak dipegai Datuk Amar Fadillah mega deka bah laban sitak iya tunga ili sungai.

“Kili kin endang udah ampuh laban enti ditu bah, dia Batu Kitang mega deka ampuh laban ai sungai deka anyut ari baruh lalu pansut kia,” ku iya.

Iya nyebut pekara nya lebuh dirandau pemberita pengudah ngabas Palan Ngenduh (PPS) di Dewan R-Piang, Kampung Sinar Budi Baru, Batu Kawa kena Hari Tiga.

Nitih penerang, projek Sungai Sarawak nya ngaul projek ngaga sungai baru sepanjai lapan kilometer dikena ngurangka ‘penyekut’ Sungai Sarawak ngambi enda penuh.

Sebedau tu, dua kilometer ari projek nya udah tembu nyambung Tasik China Selatan nuju ke Sungai Sarawak lalu diatu enam kilometer deka belabuh digaga taun baru.

Berebak enggau nya, Datuk Amar Prof Dr Sim Kui Hian madah, projek pegung rangkai mega benung digaga ba Batu Kawa dikena ngurang penanggul bah dia enggau empat pegung digaga pemesai 20 ikar.

Ngena peluang nya, iya meri terima kasih ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngagihka lebih RM200 juta dikena ngaga pegung ngandang ai nya nyadi sebagi ari pengawa mutar isu mitigasyen bah.

Saraya PPS Dewan R-Piang, Kampung Sinar Budi Baru endur lebih 181 orang tasah bah diau datai ari 44 ruang bilik.

Datuk Amar Dr Sim bisi limpang ngabas PPS di Balai Komuniti Stapok ti diatu endur 199 orang tasah bah ari 54 ruang bilik diau. -EDISI UKAS

Pemberita: Ahmad Daniel Faiz
Gambar: Ahmad Daniel Faiz & Muhd Hisyam Arif